काठमाडौँ : लुम्बीनी लायन्स नेपाल प्रिमियर लिग (एनपीएल) बाट बाहिरिएको छ ।

बुधवार भएको खेलमा काठमाण्डु गुर्खाजसंग १८ रनले पराजित हुँदै लुम्बीनी एक खेल बाँकी छँदै प्रतियोगिताबाट बाहिरिएको हो । जितकालागि १०४ रनको मध्यम लक्ष्य पछ्याएको लुम्बीनीले १९.२ ओभरमा सवै विकेट गुमाउँदै ८५ रन मात्र बनाउन सक्यो ।

उसकालागि सन्दीप जोराले बनाएको २६ रन सर्वाधिक रह्यो । उन्मुक्त चन्दले १४ तथा सुर्य तामाङले ११ रन बनाएपनि अन्य खेलाडीले दोहारो अंकको रन बनाउन सकेनन् ।

त्यसअघि त्रिवि क्रिकेट मैदान किर्तिपुरमा टस जितेर पहिले ब्याटिङ थालेको गुर्खाज १९.२ ओभरमा सवै विकेट गुमाउँदै १०३ रनमा समेटियो । गुर्खाजकालागि भिम सार्कीले सर्बाधिक ३१ रनको योगदान गरे ।

डेन डउथवेटले २१ तथा प्रतिक श्रेष्ठले २० रन बनाए । काठमाण्डु गुर्खाजलाई सस्तैमा समेट्ने क्रममा साद बिन जफरले सर्वाधिक ३ विकेट लिए । रामोन सिमन्ड्स र अविनाश गौतमले समान २/२ विकेट हात पारे ।

हारसंगै लुम्बीनी प्लेअफबाट बाहिरिने पहिलो टोली समेत बनेको छ ।