काठमाडौँ :नेपाल प्रिमियर लिग एनपिएल क्रिकेटमा कर्णाली याक्सले लुम्बिनी लायन्सविरुद्ध जितकालागि १२९ रनको बलियो लक्ष्य प्रस्तुत गरेको छ ।

त्रिवि क्रिकेट मैदान किर्तिपुरमा टस हारेर पहिले ब्याटिङमा तानिएको कर्णाली याक्सले निर्धारित ओभरमा ८ विकेट गुमाउँदै १२८ रन बनायो । उसकालागि विलियम बोसिस्टोले सर्वाधिक ४४ रनको योगदान गरे । ३० बलको सामना गरेका उनले ३ चौका र ३ छक्का प्रहार गरे । अर्धशतक बनाउन उनी ६ रनले चुके ।

अर्जुन घर्तीले २५ रन बनाए । यी दुई जोडीले पाँचौ विकेटकालागि ७२ रनको साझेदारी गरेका थिए। बाबर हायातले २० रनको योगदान गरे । २२ बल खेलेका उनले एक चौका र एक छक्का प्रहार गरे ।

चाडविक वाल्टनले १३ रन बनाए । लङ सट हान्ने क्रममा उनी तिलकको बलमा अभिषेश गौतमको हातबाट क्याच हुन पुगेका हुन् । गुल्शन झाले ८ रन बनाए । ११ बल खेलेका उनले एक चौका प्रहार गरेका थिए ।

कप्तान सोमपाल कामीले ७ तथा देव खनालले ३ रन जोडे । खनाल साद बिन जफरको बलमा रामोन सिमन्ड्सद्वारा क्याच आउट भएका हुन् । बलिङतर्फ बिकास अग्रीले सर्वाधिक ३ विकेट लिए ।

तिलक भण्डारीले दुई तथा साद बिन जफर , रामोन सिमन्ड्स र रोहित पौडेलले एक-एक विकेट लिए । पावर प्लेमा एक विकेट गुमाएर २८ रन बनाएको थियो ।