काठमाडौँ :नेपाल प्रिमियर लिग एनपीएल क्रिकेटमा आज पनि दुई खेल हुने भएका छन्।

आज हुने पहिलो खेलमा  पोखरा एभेन्जर्स र काठमाडौँ गुर्खाज बीच बिहान ९ बजे त्रिवी क्रिकेट मैदान कीर्तिपुरमा प्रतिस्पर्धा हुँदैछ । प्लेअफको सम्भावना बलियो बनाउन दुवै टोलीमाथि जित्नै पर्ने दबाब छ ।

पोखरा र काठमाडौँ दुबै टोलीले पाँच-पाँच खेल खेल्दा दुई-दुई खेलमा जित र तीन-तीन खेलमा हार बेहोर्दै समान चार-चार अङ्क बनाएको छ । नेट-रन रेटमा काठमाडौँ छैठौं स्थानमा रहँदा पोखरा समान अङ्क भएपनि सातौं स्थानमा रहेका छन्

आजै हुने दोस्रो खेलमा  चितवन राइनोज र जनकपुर बोल्ड्स बीच प्रतिस्पर्धा हुँदैछ । यी दुई टोली बीचको खेल त्रिवी क्रिकेट मैदान कीर्तिपुरमा दिउँसो१ बजे सुरु हुनेछ ।

एक खेल अगावै  प्लेअफमा पुगिसकेको जनकपुर  शीर्ष स्थानमा रहेको छ । प्लेअफको सम्भावना कायमै राख्ने हो भने चितवनमाथि आजको खेल जित्नै पर्ने दबाब समेत रहेको छ । लुम्बिनी लायन्स भने यसअघि नै प्रतियोगिताबाट बाहिरिसकेको छ ।