काठमाडौँ :हङकङ विरुद्धको यू–१९ एक दिवशीय सिरिज नेपालले जितेको छ ।

आज भएको दोस्रो खेलमा हङकङलाई २२६ रनले हराउँदै घरेलुटोली नेपालले एक खेल अगावै सिरिज २–० ले जितेको हो । जितकालागि नेपालले दिएको २९८ रनको बिशाल लक्ष्य पछ्याएको हङकङ २९.४ ओभरमा सवै विकेट गुमाउँदे ७१ रनमा अलआउट हुनपुग्यो । उसकालागि कप्तान शिभ माथुरले सर्वाधिक १६ रन जोडे ।

प्रित मंगुकिया र अरेज दारले  समान १४-१४ रन बनाएपनि अन्य ब्याटरले दोहोरो अंकको रन बनाउन सकेनन् । हङकङलाई सस्तैमा समेट्ने क्रममा दयानन्द मण्डलले सर्वाधिक ४ विकेट लिए ।

त्यसअघि मुलपानी क्रिकेट मैदानमा टस जितेर ब्याटिङ थालेको नेपालले निर्धारित ५० ओभरमा ९ विकेट गुमाएर २९७ रन बनाउको थियो । उसकालागि सोहिल कुँवरले सर्वाधिक ८१ रन जोडे ।

सन्तोष यादवले अविजित ६६ रन बनाउँदा कप्तान अभिषेक तिवारीले २६ रन जोडे । यसअघि भएको पहिलो खेलमा नेपालले हङकङलाई ३ विकेटले पराजित गरेको थियो ।