काठमाडौँ :नेपाल प्रिमियर लिग (एनपीएल) को उपाधिकालागि आज सुदूरपश्चिम रोयल्स र जनकपुर बोल्ट्सबीच प्रतिस्पर्धा हुदैछ ।

फाईनल खेल त्रिवि क्रिकेट मैदान कीर्तिपुरमा दिउँसो १ बजे सुरु हुनेछ । फाइनल अघि दुवै टोलीका कप्तानले उपाधि आफूले जित्ने लक्ष्यका साथ मैदानमा उत्रने बताएका छन् ।सुदूरपश्चिम पहिलो क्वालीफायरमा जनकपुरलाई पराजित गर्दै फाइनलमा पुगेको टिम हो भने जनकपुरले एलिमिनेटरमा जितेर आएको कर्णाली याक्सलाई स्तब्ध बनाउँदै फाइनलमा स्थान बनाएको हो ।

प्रतियोगिताको उपाधि विजेताले १ करोड १० लाख रुपैयाँ पुरस्कार पाउँदा उप विजेता हुने टिमले ५१ लाखमा चित्त बुझाउने छ । एनपीएलमा तेस्रो स्थानमा रहेको कर्णाली याक्सले २५ लाख पक्का गर्दा चौथो भएको चितवन राइनोजले १५ लाख पाउने भएको छ । एनपीएलमा ८ टिमले सहभागिता जनाएका थिए ।