काठमाडौँ :इङ्लिस प्रिमियर लिग फुटबलमा शीर्ष स्थानको लिभरपुलले म्यान्चेस्टर युनाइटेडसँग बराबरी खेलेको छ ।

आइतबार राति भएको खेलमा दुबै टोली बीचको खेल दुई–दुई गोलको बराबरीमा टुङ्गिएको हो । खेलमा युनाइटेडले अग्रता लिए पनि जित भने  निकाल्न सकेन । पहिलो हाफ गोल रहित बराबरी रोकिएको खेलमा  दोस्रो हाफमै म्यान्चेस्टर युनाइटेडले  लिसान्द्रो मार्टिनेजको गोलबाट अग्रता लिएको थियो ।  

खेलको ५२ मिनेटमा मार्टिनेजले युनाइटेडका लागि एक गोल गर्दै खेलमा १–० अग्रता बनाएको थियो । तर खेलको ५९ मिनेटमा कोडी ग्यापकोले गोल गर्दै लिभरपुलले खेललाई बराबरीमा पुर्याएपछि खेल निकै रोमाञ्चक अवस्थामा पुगेको थियो । निकै प्रतिस्पर्धात्मक खेलमा खेलको ७० मिनेटमा लिभरपुलका मोहम्मद सलाहले पाएको पेनाल्टीलाई गोलमा परिणत गरेपछि लिभरपुलले युनाइटेड विरुद्ध २–१ को अग्रता बनाएको थियो ।

तर लिभरपुलको  त्यो खुसी १० मिनेटपनि टिक्न सकेन । आमड डायलोले खेलको ८० मिनेटमा गोल गर्दै म्यानचेस्टर युनाइटेडलाई दुई–दुईको बराबरीमा पुर्याएसँगै खेल  अगाडि बढ्न सकेन । बराबरीसँगै दुवै टोलीले एक–एक अङ्क बाँडेका छन् ।बराबरी खेलेसँगै शीर्ष स्थानको लिभरपुलले ४६ अङ्क जोडेको छ ।१९ खेलबाट १४ मा जित ४ मा बराबरी र एक खेलमा हार बेहोरेको लिभरपुलले ४६ अङ्क जोडेको हो । दोस्रो स्थानको आर्सनलको ४० अङ्क छ । २० खेल खेलेको उसले ११ खेलमा जित सात खेलमा बराबरी र दुई खेलमा हार बेहोरेको छ ।

यस्तै तेस्रो स्थानको नटिघंम फरेस्टले ३७ अंक जोडेको छ । चौथो स्थानको चेल्सीको ३६ अंक छ भने पाँचौं स्थानको न्यूक्यासलको ३५ अङ्क रहेको छ ।