नवलपुर : सिन्धुपाल्चोक जिल्लाको पाँचपोखरी थाङपाल ४ थाङपालकोटमा दोस्रो रामबहादुर तामाङ स्मृति फुटबल प्रतियोगिता सुरु भएको छ । 
न्यु जेनेरेसन थाङपालकोट क्लबको आयोजनामा पाँचपोखरी थाङपाल गाउँपालिका वडा नम्बर ४ का स्वर्गिय पूर्व वडाअध्यक्ष राम बहादुर तामाङको सम्झनामा फुटबल प्रतियोगिता भएको हो । पेमाथाङ समानता खेल मैदान थाङ्गपालकोटमा आजबाट सुरु भएको प्रतियोगितामा १७ टिम सहभागि रहेको क्लबका पुर्व संयोजक तथा खेलडी आकाश लामाले जानकारी दिए । 
आज भएको उद्घाटन खेलमा न्यु जेनेरेसन थाङपालकोट र लेखर्क युवा क्लव बिच भएको प्रतिस्पर्धामा आयोजक न्यु जेनेरेसन थाङपालकोटले लेखर्क युवा क्लवलाई ४–० ले पराजित गर्यो । त्यस्तै आज भएको दोस्रो खेलमा योङ हार्टले मण्डला युवा क्लवलाई ३–१ हराउँदै विजयी भएको छ भने तेस्रो खेलमा बोलगाउँ बरुवा र धिताल बहादुर टिम बिच भएको प्रतिस्पर्धामा बोलगाउँले धिताल बहादुरलाई २–१ गोल पराजित गरेको छ । 
थाङपालधाप र गुन्सा बिच भएको आजको अन्तिम खेलमा थाङपालधापलाई २–१ गोल अन्तरले पराजित गर्दै गुन्साले बिजयी सुरुवात गरेको छ । 
यहि माघ १९ गते सम्म सञ्चालन हुने प्रतियोगितामा विजेता हुने टिमले रु १ लाख, शिल्ड, मेडल र प्रमाण पत्र पुरस्कार पाउनेछन् । उपविजेता टिमले रू. ५० हजार शिल्ड, मेडल र प्रमाण पत्र पुरस्कार प्राप्त गर्ने आयोजक टिमका संयोजक तेन्जिङ लामाले जानकारी दिए । 
प्रतियोगिताको उद्घाटन गर्दै गाउँपालिका अध्यक्ष टासी लामाले संयमित भएर खेल सम्पन्न गर्नका लागी आयोजकलाई सुझाव दिए । उहाँले खेलका नियम, कानुनलाई ध्यान दिदैं महत्त्वपूर्ण भुमिका निर्वाह गर्न समेत आग्रह गरे । बाहिर बाट आउने खेलाडी हरुलाई स्वागत गर्दैै असल संस्कारको परिचय दिनुपर्नेमा जोड दिए । कार्यक्रममा जिल्ला फुटबल संघका अध्यक्ष अमृतमान श्रेष्ठ, गाउँपालिकाका प्रमुख सल्लाहकार शिशिर वाइबा, वडा नम्बर ६ का अध्यक्ष एवम् प्रवक्ता नारायण भट्टराई, वडा नम्बर ५ का अध्यक्ष काले गोले लगायतको उपस्थिती रहेको थियो ।