नवलपुर :पाँचपोखरी कप प्रथम जिल्ला स्तरीय फुटबल प्रतियोगितामा शनिवार लिग चरणका ३ खेलहरु भएका छन् ।

शनिवारको खेलमा पाँचपोखरी थाङ्पाल गाउँपालिका र सुनकोशी गाउँपालिकाले १–१ गोलको बराबरी खेलेका छन् भने दोस्रो खेलमा बाह्रविसे नगरपालिका र लिसंखुपाखर गाउँपालिकाले पनि गोल रहित बराबरी खेलेको छ ।

शनिवारको अन्तिम तथा तेस्रो खेलमा भने चौतारा साँगोचोकगढी नगरपालिकाले मेलम्ची नगरपालिकालाई २–१ गोलन्तरले पराजित गरेको छ । १९ गतेसम्म सञ्चालन हुने प्रतियोगिता को लिग चरणका खेलहरू आइतवार पनि जारी रहने पाँचपोखरी थाङ्पाल गाउँपालिका खेलकुद विकास समितिका अध्यक्ष ग्याल्बो साम्देनले जानकारी दिए ।

शनिवारको खेलहरूमा निमासिङ्गी लामा अनार श्रेष्ठ र भीमबहादुर गुरुङ म्यान अफ दि म्याच घोषित भएका छन् । 

लिग चरण अन्तर्गत आइतवार हेलम्बु र सुनकोशी इन्द्रावती र बाह्रबिसे तथा पाँचपोखरी र भोटेकोसी बीच प्रतिस्पर्धा हुने छ । पाँचपोखरी थाङ्पाल गाउँपालिका आयोजना र जिल्ला फुटबल संघको प्राबिधिक सहयोगमा वडा नम्बर–४ मा रहेको पेमाथाङ्ग समानता खेलकुद मैदानमा जारी प्रतियोगितामा जिल्लाभरिका १० टोली सहभागी छन् । प्रतियोगिता २० गतेसम्म सञ्चालन हुने पनि अध्यक्ष साम्देनले जानकारी  दिए ।

प्रतियोगिताको विजेताले १ लाख रुपैयाँ र उपविजेता हुने टोलीले ५० हजार नगदसहित विभिन्न पुरस्कार प्राप्त गर्ने आयोजकले जनाएको छ ।