काठमाडौ : ‘सशस्त्र प्रहरी महानिरीक्षक कप–२०८१’ को रनिङ्ग ट्रफि नं ७ बैद्यनाथ बाहिनी मुख्यालय कैलालीले हात पारेको छ ।

सशस्त्र प्रहरी बल नेपाल प्रधान कार्यालय स्वयम्भु हलचोकमा संचालन भएको प्रतियोगितामा ८ स्वर्ण, ५ रजत र ३ कास्य गरी कुल १६ पदकसहित बैद्यनाथ बाहिनी प्रथम भएको हो ।८ स्वर्ण, ५ रजत र २ कास्यसहित     नं. ५ विन्ध्यावासिनी बाहिनी मुख्यालय रुपन्देही दोस्रो भएको छ । ४ स्वर्ण, ७ रजत र ८ कास्यसहित नं. १ बराह बाहिनी मुख्यालय सुनसरी तृतीय भएको शसस्त्र प्रहरीका  सह प्रबक्ता डिएसपी शैलेन्द्र थापाले जानकारी दिए । सशस्त्र प्रहरी महानिरीक्षक राजु अर्यालले प्रतियोगिताको समापन गर्नुकासाथै बिजयी टिम, खेलालीहरुलाई ट्रफी, मेडल प्रदान गर्नुको साथै उत्कृष्ट खेलाडीहरुलाई पुरस्कार समेत प्रदान गरेका थिए ।  

समापन समारोहमा सशस्त्र प्रहरी महानिरीक्षक अर्यालले खेलकुदले व्यक्तिमा सामूहिक भावनाको विकास गर्नुको साथै अनुशासन कायम राख्न महत्वपूर्ण भूमिका खेल्ने बताए । उनले प्रकारको खेलकुदले सशस्त्र प्रहरी कर्मचारीहरुमा भाइचाराको भावना बढाउनुको साथै कार्यक्षेत्रमा परिचालन हुँदा राष्ट्रसेवकहरुको मनोबल उच्च भई उत्कृष्ट कार्यसम्पादन सहयोग पुग्ने विश्वास व्यक्त गरे । 
फुटबल तर्फ नं. १ बराह बाहिनी मुख्यालय सुनसरीलाई ट्राइबेकरमा ५–४ को गोल अन्तरले हराउँदै छिन्नमस्ता बाहिनी मुख्यालय महोत्तरीले उपाधि जितेको छ ।     

नेपाल एपीएफ क्लवको आयोजनामा यही चैत ३ गतेदेखि संचालन भएको प्रतियोगितामा राष्ट्रिय सशस्त्र प्रहरी बल प्रशिक्षण प्रतिष्ठान र सशस्त्र प्रहरी बल नेपालका बाहिनी मुख्यालयहरु गरी नौ टोलीले सहभागिता जनाएका थिए । २०औं राष्ट्रिय महिला कवड्डी प्रतियोगितामा उपाधि जित्न सफल नेपाल एपीएफ क्लबका महिला कवड्डी खेलाडीहरुलाई सोही समारोहमा सम्मान गरिएको थियो ।