काठमाडौँ : इन्डियन प्रिमिर लिग आईपिएल क्रिकेटमा आज मुम्बई इन्डियन्स र कोलकाता नाइट राइडर्सबीच प्रतिस्पर्धा हुँदैछ ।

खेल मुम्बईस्थित वाङ्खडे स्टेडियममा राति पौने ८ बजे सुरु हुनेछ । जारी प्रतियोगितामा मुम्बई आज पहिलो जितको खोजीमा घरेलु मैदानमा उत्रिँदैछ । आफ्ना सुरुवाती दुवै खेलमा हार व्यहोरेको मुम्बई अंकविहीन रहँदै तालिकाको पुछारमा छ ।

कोलकाता भने एक खेलमा जित र एक खेलमा हारसहित २ अंक जोडेर तालिकाको छैटौँ स्थानमा छ । यसअघि गएराति भएको खेलमा राजस्थान रोयल्सले पहिलो जित हात पारेको थियो । पहिला दुई खेलमा पराजित भएको राजस्थानले तेस्रो खेलमा चेन्नई सुपरकिंग्सलाई ६ रनले हराएको हो । टस हारेर ब्याटिङको निम्तो पाएको राजस्थानले निर्धारित २० ओभरमा ९ विकेट गुमाई १ सय ८२ रन बनाएको थियो । जवाफमा आएको चेन्नईले ६ विकेट गुमाई १ सय ७६ रन मात्र बनाउन सक्यो ।

हिजै भएको पहिलो खेलमा सनराइजर्स हैदराबाद दिल्ली क्यापिटल्ससँग ७ विकेटले पराजित भयो ।