विराटनगर : मोरङ र सप्तरी इक्युवालिटि कप क्रिकेटको फाइनलमा प्रवेश गरेको छ ।

लगातार दुई खेल जितेको मोरङ र सप्तरी एक खेल अगावै फाइनलमा पुगेको हो । साविक विजेता मोरङले इलामलाई ९ विकेटले पराजित गर्दै मोरङ शिर्षमा रहँदै फाइनलको यात्रा तय गरेको हो । इलामले दिएको ६३ रनको झिनो लक्ष्य मोरङले ५.५ बलमा मात्र १ विकेटको क्षतिमा भेट्टायो । मोरङको जितमा प्लेयर अफ द म्याच पूर्णीमा राजवंशीले अविजित ३२ रन बनाउँदा सानु राजवंशी १० रनको योगदान दिइन् । पूर्णीमाले २७ बलमा ६ चौका प्रहार गरिन् । इलामकी रञ्जना लिम्बुले १ विकेट लिइन् । लगातार दुई खेलमा पराजीत इलाम प्रतियोगिताबाट बाहिरिएको छ ।

त्यसअघि टस जितेर ब्याटिङ गरेको इलामले निर्धारित २० ओभरको खेलमा १७ दशमलव ४ बलमा सवै विकेट गुमाई ६२ रनमा सिमित भयो । इलामका कुनै पनि ब्याटरले दोहोरो अंकको रन बटुल्न सकेनन् । इलामले ४१ रन अतिरिक्त पाएको थियो । मोरङकी सानु राजवंशीले २ विकेट लिँदा चाँदनी साह, फुलकुमारी राजवंशी र बन्धना राजवंशीले २–२ विकेट लिइन् ।
दोस्रो खेलमा  सप्तरीले सिरहालाई ८ रनले पराजित गरेको छ । सप्तरीले खेलेको दुई खेलमा जित हात पार्दै दोस्रो स्थानमा यथावत रहदैँ फाइनलमा प्रवेश गरेको छ । दुवै खेलमा पराजित हुँदै सिरहा भने प्रतियोगिताबाट बाहिरिएको छ ।

टस जितेर ब्याटिङ गरेको सप्तरीले निर्धारित २० ओभरमा ९ विकेट गुमाउँदै १ सय २ रनको सामान्य योगफल तयार पारेको थियो । सप्तरीकी प्लेयर अफ द म्याच साक्षी यादवले सर्वाधिक ५७ रन बनाइन् । उनले ५४ बलमा ६ चौका प्रहार गरिन् । सिरहाकी अनुराधा चौधरीले ४ विकेट लिँदा सरस्वती चौधरीले ३ विकेट लिएकी थिइन् ।

 १ सय ३ रनको सामान्य लक्ष्य पछ्याएको सिरहाले पुरै ओभर खेल्दै ९ विकेट गुमाई ९४ रन बनाएको थियो । सिरहाकी सरस्वती मुखीयाले अविजित १३ रन बनाउँदा प्रसिद्का खडकाले अविजित ११ रन बनाइन् । सप्तरीकी अपेक्षा यादवले ४ विकेट लिँदा साक्षी यादव र सुस्मीता यादवले समान २–२ विकेट लिइन् ।

म्यारिलीबोन क्रिकेट क्लब फाउण्डेशन र क्रिकेट विथआउट बाउण्ड्रीजको सहयोग तथा नेपाल क्रिकेट फाउण्डेशनको आयोजनामा विराटनगर ६ मा रहेको म्यारिलिबोन ज्वाला क्रिकेट मैदानमा  चौथो संस्करणको ‘इक्वालिटि कप क्रिकेट २०२५’ प्रतियोगिता भईरहेको हो । क्रिकेटमा महिलाको सहभागिता अभिवृद्धि अभियान अन्तर्गत इक्युवालिटि कप क्रिकेट आयोजना भएको हो ।