काठमाडौँ : अफगानिस्तान विरुद्दको यू–१९ एक दिवशीय क्रिकेटमा नेपाल पराजित भएको छ ।

आज भएको श्रृखंला अन्तर्गतको पहिलो खेलमा नेपाल अफगानिस्तानसंग १३० रनले पराजित भएको हो । जितका लागि ३०१ रनको विशाल लक्ष्य पछ्याएको नेपालले ४६.२ ओभरमा सवै विकेट गुमाउँदै १७० रन मात्र बनाउन सक्यो ।

नेपालकालागि निरज कुमार यादवले अर्धशतकिय पारी खेल्दै सर्वाधिक ५३ रन जोडेपनि अन्य ब्याटरले सम्झन लायकको प्रदर्शन गर्न सकेनन् । सन्तोष यादव र अशोक धामीले समान २४–२४ रन जोडे । अभिषेक तिवारीले १७ तथा कप्तान नरेन भट्टले १३ रन बनाए ।

त्यसअघि मुलपानी क्रिकेट मैदानमा टस जितेर पहिले ब्याटिङ थालेको अफगानिस्तानले निर्धारित ओभरमा ९ विकेटको क्षतिमा ३०० रन बनायो । उसकालागि फैसल शिनोजादाले सर्वाधिक ९७ रन जोडे । ८८ बल खेलेका उनले ९ चौका र ४ छक्का प्रहार गर्दै शतक बनाउन ३ रनले चुके । खालिद अहमदजाईले ७६ ,बरकत इब्राहिमजाईले ३५ तथा उजैरुल्लाह नियाजाईले २४ रन बनाए । बलिङतर्फ सन्तोष यादवले सर्वाधिक ३ विकेट लिए । अभिषेक तिवारीले दुई तथा दयानन्द मण्डल र बिपिन शर्माले १–१ विकेट लिए ।

घरेलु मैदानमा हुने यू–१९ विश्वकप छनौटको तयारी स्वरुप नेपालले अफगानिस्तानसंग प्रतिस्पर्धा गरिरहेको छ । नेपाल भ्रमणमा रहेको अफगानिस्तानले नेपालसंग ३ खेलको ओडिआई सिरिज खेल्नेछ ।

दोस्रो खेल आगामी आइतवार तथा अन्तिम खेल बुधवार हुनेछ । हारसंगै नेपाल सिरजमा १–० ले पछि परेको छ ।