काठमाडौँ :इन्डियन प्रिमियर लिग (आईपीएल) क्रिकेटमा चेन्नई सुपर किङ्सले लखनउ सुपर जायन्ट्सलाई हराएको छ ।

सोमवार राति भएको खेलमा चेन्नईले लखनउलाई उसकै मैदानमा ५ विकेटले हराएको हो । लखनउले दिएको १६७ रनको लक्ष्य चेन्नईले १९.३ ओभरमा पाँच विकेटको क्षतिमा भेट्टायो । चेन्नईका लागि शिवम दुवेले सर्वाधिक  ४३ रन जोडे ।  रविन्द्र जडेजाले ३७ तथा महेन्द्रसिंह धोनीले २६ रन बनाए ।

त्यसअघि अटल बिहारी क्रिकेट स्टेडियममा टस हारेर पहिला ब्याटिङ थालेको लखनउले निर्धारित २० ओभरमा सात विकेट गुमाएर १६६ रन जोडेको थियो । उसकालागि  लागि कप्तान ऋषभ पन्तले सर्वाधिक ६३ रन बनाए ।

मिचेल मार्सले ३०, आयुष बदोनीले २२ तथा अब्दुल समदले २० रन बनाए । जितका बावजुत चेन्नई अंक तालिकाको पुछारमा छ ।