काठमाडौँ : दक्षिण अफ्रिका विरुद्धको एक दिवशीय सिरिज अफगानिस्तानले जितेको छ ।

शुक्रवार राती भएको दोस्रो खेलमा दक्षिण अफ्रिकालाई १७७ रनले हराउँदै अफगानिस्तानले एक खेल अगावै सिरिज २–० ले आफ्नो पक्षमा पारेको हो । जितकालागि अफगानिस्तानले दिएको ३१२ रनको विशाल लक्ष्य पछ्याएको दक्षिण अफ्रिका ३४.२ ओभरमा १३४ रनमा अलआउट भयो ।

उसकालागि कप्तान तेम्बा भावउमाले सर्वाधिक ३८ रनको योगदान गरे । टोनी दि जोर्जीले ३१ ,एडन मार्करमले २१ रन तथा रिजा हेनरिकले १७ रन बनाएपनि अन्य कुनैपनि खेलाडीले दोहोरो अंकको रन बनाउन सकेनन् ।

दक्षिण अफ्रिकालाई सस्तैमा समेट्ने क्रममा राशिद खानले सर्वाधिक ५ विकेट लिए । नङ्गेलिया खरोटेले ४ विकेट हात पारे ।

त्यसअघि युएईको सारजहा क्रिकेट स्टेडियममा टस जितेर पहिले ब्याटिङ थालेको अफगानिस्तानले निर्धारित ओभरमा ४ विकेटको क्षतिमा ३११ रन बनाएको थियो । उसकालागि रहमानउल्लाह गुरबाजले शतकिय पारी खेल्दै सर्वाधिक १०५ रनको योगदान गरे । अजमातुल्लाह उमरजाईले अविपजत ८० रन जोड्दा रहमत शाहले ५० रन जोडे ।

यसअघि भएको पहिलो खेलमा अफगानिस्तान ६ विकेटले विजयी भएको थियो । तेस्रो तथा अन्तिम खेल आईतवार हुनेछ ।