काठमाडौँ : एएफसी यु–१७ एसियन कप छनोट फुटबलमा नेपालले दोस्रो हार ब्यहोरेको छ ।

दोहाको एसपायर एकेडेमी पिचमा शुक्रवार राती भएको खेलमा नेपाल घरेलु टोली कतारसंग ५–० गोलले पराजित भएको हो । पहिलो हाफमा दुई शुन्यले पछि परेको नेपालले दोस्रो हाफमा थप ३ गोल खान पुग्यो । खेलको २१ औँ र ४५ औँ मिनेटमा गोल खाएको नेपालले दोस्रो हाफको ५५,६६ र ८३ मिनेटमा थप गोल खाएको हो ।

बुधबार भएको पहिलो खेलमा नेपाल जापानसँग ९–२ गोलको फराकिलो अन्तरले पराजित भएको थियो । कतारले भने प्रतियोगितामा लगातार दोस्रो जित निकालेको छ ।

पहिलो खेलमा उसले मंगोलियालाई २–० ले पराजित गरेको थियो । नेपालले अहिलेसम्म समूह चरण पार गर्न सकेको छैन ।

नेपालले सन् २०००, २००६ र २०१६ मा यो प्रतियोगिता खेलेको थियो । सहभागि ४३ टोलीलाई १० समूहमा विभाजन गरिएको छ ।