काठमाडौँ :द हङकङ सिक्सेज क्रिकेटमा नेपालले लगातार दोस्रो जित निकालेको छ ।

आज भएको दोस्रो खेलमा अष्ट्रेलियालाई ११ रनले हराउँदै नेपालले दोस्रो जित निकालेको हो । जितकालागि नेपालले दिएको ११२ रनको लक्ष्य पछ्याएको अष्ट्रेलियाले निर्धारित ओभरमा ४ विकेट गुमाउँदै १०० रन मात्र बनाउन सक्यो ।

उसकालागि ज्याक वुडले नटआउट सर्वाधिक ५५ रन जोडे । एलेक्स रोसले १४ तथा डेन क्रिश्चियनले ९ रन बनाउँदा कप्तान सैम हेजलेटले १ रन बनाए । उसलाई सस्तैमा समेट्ने क्रममा प्रतिश जीशीले सर्वाधिक ३ विकेट लिए । लोकश बम र बिबेक यादबले एक-एक विकेट लिए ।

त्यसअघि मिशन रोड मैदान, मोङ कोकमा टस हारेर पहिले ब्याटिङमा तानिएको नेपालले निर्धारित ६ ओभरमा २ विकेट गुमाउँदै १११ रन बनायो ।

नेपालकालागि कप्तान सन्दीप जोराले अर्धसतक प्रहार गर्दै रिटायर्ट आउट भए । १६ बल खेलेका उनले ५ चौका र ६ छक्का प्रहार गरे । लोकेश बमले ३३ तथा बिबेक यादब र राशिद खानले १२ रन जोडे ।