काठमाडौँ : पाकिस्तानलाई हराउँदै द हङकङ सिक्सेसको उपाधि श्रीलंकाले हात पारेको छ ।

आज आइतवार हङकङमा भएको फाइनलमा पाकिस्तानलाई तीन विकेटले हराउँदै श्रीलंकाले दोस्रो पटक हङकङ सिक्सेसको उपाधि जितेको हो । जितकालागि पाकिस्तानले दिएको ७३ रनको लक्ष्य श्रीलंकाले ५ ओभरमा ३ विकेटको क्षतिमा भेटायो । श्रीलंकाको जितमा स्यान्दुन विराकोडीले सर्वाधिक ३४ रनको योगदान गरे । कप्तान लिहुरु मधुशंकाले १९ रन बनाए ।

त्यसअघि टस हारेर पहिले ब्याटिङमा तानिएको पाकिस्तानले ५.२ ओभरमा सवै विकेट गुमाउँदै ७२ रन मात्रै बनाउन सक्यो । उसकालागि मुहम्मद अखलाकले ४८ तथा फहीम अशरफले १३ रन बनाएपनि अन्य खेलाडीले दोहोरो अंकको रन बनाउन सकेनन् ।

पहिलो पटक प्रतियोगितामा सहभागिता जनाउको नेपाल क्वार्टरफाइनलमा श्रीलंकासँगै पराजित भएको थियो । त्यसअघि समूह चरणको खेलमा नेपालले इङल्याण्ड र अस्ट्रेलियालाई पराजित गरेको थियो ।