काठमाडौँ :वेस्ट इन्डिजविरुद्ध अन्तर्राष्ट्रिय टी–२० शृंखला इङ्ल्यान्डले जितेको छ ।

शुक्रबार सम्पन्न तेस्रो खेलमा इङ्ल्यान्डले घरेलुटोलीमाथि  तीन विकेटको जित निकालेको हो । जितसंगै इङ्ल्यान्डले दुई खेल अगावै श्रृखंला ३–० ले आफ्नो पक्षमा पारेको हो । वेस्ट इन्डिजले दिएको १४६ रनको लक्ष्य इङ्ल्यान्डले १९.२ ओभरमा सात विकेटको क्षतिमा भेट्टायो ।

उसको जितमा साम करनले सर्वाधिक ४१ रनको योगदान गरे । लियम लिभिङ्गस्टोनले ३९ तथा विल ज्याकले ३२ रन जोडे ।

त्यसअघि डारेन सामी नेसन्नल क्रिकेट मैदानमा टस हारेर पहिले ब्याटिङको निम्तो पाएको वेस्ट इन्डिजले निर्धारित २० ओभरमा आठ विकेट गुमाउँदै १४५ रन बनाएको थियो ।

उसकालागि कप्तान रोभमन पावेलले सर्वाधिक ५४ रनको योगदान गरे । रोमारियो शेफर्डले ३० तथा अल्जारी जोसेफले अविजित २१ रन जोडे ।

यसअघि भएको खेलमा इङ्ल्यान्डले घरेलुटोलीलाई आठ र सात विकेटले हराएको थियो ।